Kjo fundjavë do të shoqërohet me mot të paqëndrueshëm, por temperatura mbi mesataren e janarit. Dita e shtunë pritet me vranësira dhe reshje të pakta e të izoluara, ndërsa termometri do të shënojë rritje, me maksimumet që arrijnë deri në 18°C në zonat perëndimore.
Të dielën moti mbetet i paqëndrueshëm, me rrebeshe të izoluara, kryesisht në veriperëndim dhe jugperëndim. Temperaturat rriten edhe më tej, duke u afruar pranë 20°C, vlerë maksimale për këtë fundjavë.
Vëmendje duhet treguar ndaj erës. Gjatë së shtunës do të fryjë e lehtë deri mesatare, por nga mbrëmja e së shtunës dhe gjatë gjithë së dielës pritet forcim i ndjeshëm i saj me drejtim jugor. Në zonat detare shpejtësia e erës mund të kalojë 80 km/h, duke sjellë stuhi detare dhe dallgëzim të fortë.
Nga e hëna sistemi i paqëndrueshëm largohet gradualisht. Reshjet dobësohen, ndërsa temperaturat nisin një rënie të lehtë, duke u kthyer drejt vlerave tipike të dimrit gjatë mesjavës. Reshjet e dëborës do të mbeten të kufizuara vetëm në zonat e thella malore.
👉 Fundjavë e ngrohtë për stinën, por me erë të fortë dhe det të trazuar. Kujdes në lundrim dhe aktivitete pranë bregdetit.
