Kryetari i “Lëvizja Bashkë”, Arlind Qori, ka reaguar lidhur me vizitën e kryeministrit Edi Rama në Izrael dhe takimin e tij me homologun izraelit, Benjamin Netanyahu.
Përmes një postimi në rrjetet sociale, Qori theksoi se Netanyahu është i akuzuar për krime lufte dhe krime kundër njerëzimit në Gaza nga Gjykata Penale Ndërkombëtare (GJPN).
Sipas tij, nëse takimi mes Ramës dhe Netanyahut do të ishte zhvilluar në territorin e Republikës së Shqipërisë, vendi ynë do të kishte detyrimin ligjor ta dorëzonte kryeministrin izraelit pranë Gjykatës Penale Ndërkombëtare.
“Sot Edi Rama është takuar me Kryeministrin e Izraelit, Benjamin Netanyahu. Kush nuk e di, Netanyahu është i akuzuar për krime lufte dhe krime kundër njerëzimit në Gaza nga Gjykata Penale Ndërkombëtare.
Që prej viti 2003 Republika e Shqipërisë ka rratifikuar traktatin e Romës dhe njeh juridiksionin e kësaj gjykate.
Kështu që sikur ky takim të mos zhvillohej në Izrael, por në Republikën e Shqipërisë, Shqipëria do kishte detyrimin ligjor, jo vetën ndërkombëtar por për pasojë kombëtar që ta dorëzonte Netanyahun para inistitucionit të Gjykatës Penale ndërkombëtare.
Një shtet nuk ka vetëm interesa, ka edhe dinjitet dhe rreputacion në marrëdhëniet ndërkombëtare dhe kur humb dinjitetin dhe rreputacionin nuk e ke për gjë pastaj të shkelësh edhe interesat kombëtare, siç kjo qeveri ka bërë vitet e fundit. Sot është një ditë, ku Edi Rama na bën me turp të gjithëve,” tha Qori.
