Situata më problematike e motit mbetet në Greqi, ku era e fortë dhe reshjet me intensitet mesatar deri të lartë po prekin brigjet dhe ishujt grekë. Era është faktori kryesor i rrezikut për ditën e sotme, ndërsa nga nesër reshjet pritet të intensifikohen edhe më tej, veçanërisht në ishujt e Egjeut dhe përgjatë brigjeve greke e turke.
Në territorin shqiptar nuk parashikohen problematika serioze. Reshjet do të vijojnë deri në orët e mbrëmjes dhe pak gjatë natës, kryesisht me intensitet mesatar dhe herë pas here të lartë, por afatshkurtra. Mund të ketë vetëm grumbullime të përkohshme uji në disa zona urbane të njohura për ndjeshmëri ndaj reshjeve intensive, pa krijuar situata problematike.
Gjatë natës moti përmirësohet. Nesër reshjet do të kufizohen kryesisht në jug të vendit, pasi kjo zonë mbetet në periferi të stuhisë që godet Greqinë. Qendra do të ketë vetëm momente të shkurtra me pika shiu, ndërsa veriu do të mbetet pothuajse pa reshje.
E njëjta tablo parashikohet edhe për të premten dhe të shtunën: reshje mesatare dhe rrebeshe të shkurtra në jug dhe juglindje, ndërsa pjesa tjetër e vendit me pak ose aspak reshje. Dita e diel dhe e hëna pritet të jenë pa reshje në të gjithë territorin shqiptar.
Temperaturat mbeten të larta dhe jo tipike për dimrin. Maksimumet do të luhaten nga 17 deri në 18°C për disa ditë radhazi, duke i dhënë motit më shumë karakter vjeshte sesa dimri, edhe pse jemi në prag të muajit shkurt.
👉 Ndërsa Greqia përballet me stuhi dhe reshje intensive, Shqipëria mbetet në kushte të qeta, me reshje të kufizuara dhe temperatura të larta për stinën.