Sipas sinoptikanes Tanja Porja, kjo fundjavë pritet të karakterizohet kryesisht nga mot i qëndrueshëm dhe kthjellime në pjesën më të madhe të territorit shqiptar. Sipas parashikimit, dita e shtunë do të dominohet nga dielli dhe temperatura në rritje, ndërsa reshjet do të jenë pothuajse të papërfillshme.
Temperaturat minimale të mëngjesit do të luhaten nga rreth 3°C në zonat e thella malore deri në 10–12°C në ultësirën perëndimore. Në mesditë pritet një rritje e ndjeshme e temperaturave, me maksimumet që do të arrijnë deri në 23°C në vijën bregdetare, ndërsa në zonat malore do të variojnë nga 15 deri në 17°C.
Gjatë ditës së shtunë priten vranësira të lehta dhe kalimtare, kryesisht në jug dhe pjesërisht në qendër të vendit, ndërsa pjesa më e madhe e perëndimit do të mbetet me mot të kthjellët. Në disa zona të kufizuara në juglindje mund të ketë momente shumë të shkurtra me pika shiu, por pa ndikim në aktivitetet e fundjavës.
Edhe dita e diel do të sjellë vranësira më të dukshme, por reshjet do të jenë të pakta dhe të izoluara, kryesisht në pjesën lindore të vendit gjatë orëve të pasdites.
Sa i përket ditëve në vijim, e hëna mund të ketë vetëm reshje të papërfillshme në zona të izoluara, ndërsa nga e marta deri të enjten pritet stabilizim i kushteve atmosferike, me mot kryesisht të kthjellët dhe temperatura pa ndryshime të mëdha, por pak më të freskëta në mesditë.
Në rajonin e Ballkanit parashikohet një fundjavë me diell dhe vranësira të shpeshta, me reshje shumë të pakta dhe të izoluara vetëm ditën e dielë. Temperaturat do të shënojnë rritje të lehtë, duke arritur deri në 20°C në pjesën veriore të rajonit dhe deri në 24°C në zonat jugore.
Edhe në shkallë europiane, moti paraqitet kryesisht i qëndrueshëm. Pjesa më e madhe e kontinentit do të ketë kthjellime dhe temperatura në rritje, ndërsa reshje më intensive priten vetëm në gadishullin Iberik. Europa Juglindore dhe rajoni i Mesdheut do të vijojnë me temperatura të larta për sezonin, në disa zona edhe mbi 25°C.
