Gjykata e Apelit të Perugia la në fuqi dënimin e shkallës së parë me 6 muaj burgim për italianin e pandehur, që sipas gjyqtarit, “fakti se shqiptari kishte hyrë ilegalisht, nuk e përjashton atë nga përgjegjësia”.
Tragjedia ndodhi më 30 korrik 2018. Shqiptari 77-vjeçar kishte hyrë në një pronë private përmes një porte që ishte e mbyllur me dry, por mjaftueshëm e gjerë për të lejuar hyrjen, për të vjedhur manaferra nga një kopsht i lënë pas dore, që kishte mbetur i paprekur për vite me radhë.
Megjithatë, i fshehur nga pamja midis ferrave ishte një pus, dhe ai ra brenda, duke vdekur. Për atë vdekje, të klasifikuar si vrasje nga pakujdesia, pronari i tokës u dënua me gjashtë muaj burg në shkallën e parë. Dënimi u la në fuqi nga Gjykata e Apelit e Perugias.
Rindërtimi i ngjarjeve nga gjykata tregon historinë e burrit 77-vjeçar që kishte dalë nga shtëpia e tij për një shëtitje.
Gjatë rrugës, ai kishte një portë gjysmë të hapur që shënonte kufirin e një prone private, dhe në atë kopsht të braktisur, ai kishte vënë re një kaçubë me ferra të mbushura me manaferra. Kështu që ai kishte hyrë brenda për të mbledhur disa.
Ajo që ai nuk mundi të shihte ishte se, pikërisht poshtë atyre ferrave, ndodhej gryka e një pusi të vjetër artezian, të hapur me dorë, mbi katër metra i thellë dhe një metër e gjysmë në diametër, i veshur me gurë, informon media italiane.
Fatkeqësisht ai kishte rënë brenda pa e kuptuar boshllëkun.
Në buzë të hapjes, shpëtimtarët kishin gjetur një qese plastike që përmbante manaferra të sapokëputura.