Një ngjarje tronditëse është regjistruar gjatë një transmetimi live në Kinë, ku një influencere e njohur u shemb papritur para kamerës dhe ndërroi jetë vetëm pak minuta më vonë. Viktima është identifikuar si Wang Yefei, 39 vjeçe, e njohur në internet me emrin Wang Zha Jie. Ajo kishte krijuar një komunitet prej rreth 130 mijë ndjekësish duke promovuar dhe shitur veshje për gra përmes transmetimeve të drejtpërdrejta në rrjetet sociale.
Sipas raportimeve, në ditën e ngjarjes ajo kishte nisur transmetimin rreth orës 08:30 të mëngjesit, duke prezantuar veshje të ndryshme për ndjekësit e saj, ashtu siç bënte zakonisht. Rreth gjysmë ore pas nisjes së transmetimit, situata ndryshoi papritur. Wang filloi të ankohej për dhimbje të forta në kokë, qafë dhe shpatulla, duke treguar shenja të qarta shqetësimi.
Ajo kërkoi ndihmë nga personat që ndodheshin pranë saj dhe u kërkoi që të telefononin numrin 120, shërbimin e urgjencës mjekësore në Kinë. Në disa momente ajo paralajmëroi se mund të humbiste ndjenjat. Pak sekonda më vonë, transmetimi u ndërpre papritur pasi ajo u rrëzua.
Influencerja u dërgua me urgjencë në spital, por pavarësisht përpjekjeve të mjekëve, ajo ndërroi jetë. Sipas mediave lokale, shkaku i vdekjes ishte një hemorragji në trungun e trurit, një gjendje shumë e rëndë që mund të shkaktojë përkeqësim të menjëhershëm të gjendjes shëndetësore.
