Vranësirat do të dominojnë motin në të gjithë territorin shqiptar gjatë ditës së sotme, ndërsa reshjet do të jenë fillimisht të pakta. Ato nisin në veri dhe gradualisht përfshijnë edhe zonat qendrore, për t’u shtrirë në të gjithë vendin gjatë mbrëmjes, ku në ultësirën perëndimore priten edhe rrebeshe afatshkurtra.
Temperaturat kanë pësuar rënie të lehtë, me maksimumin që zbret në rreth 19°C nga 22°C që ishte një ditë më parë.
Për pesë ditët në vijim, vendi do të mbetet në kushte të paqëndrueshme atmosferike. Deri të premten priten vranësira të shpeshta dhe reshje të herëpashershme, kryesisht afatshkurtra. Të mërkurën dhe të enjten reshjet do të jenë më të dukshme, me intensifikim të përkohshëm sidomos në veri dhe në qendër, ndërsa nuk përjashtohen rrebeshe të izoluara.
Ndërkohë, reshjet e dëborës do të jenë prezente në zonat malore, duke nisur sot në lartësitë mbi 1200 metra. Të martën ato zbresin në rreth 1000 metra, ndërsa të enjten deri në 800–900 metra mbi nivelin e detit, si pasojë e rënies së temperaturave. Të premten reshjet do të jenë më të pakta dhe të përqendruara kryesisht në zonat lindore, në formën e dëborës, ndërsa pjesa perëndimore pritet të jetë kryesisht pa reshje.
Fundjava sjell një përmirësim të dukshëm të kushteve të motit. Edhe pse vranësirat do të jenë ende të pranishme, reshjet do të ndërpriten dhe moti do të stabilizohet.
Sa i përket temperaturave, pas një rënieje të ndjeshme gjatë mesjavës, ku minimumet zbresin deri në -1 apo -3°C në zonat malore dhe maksimumet arrijnë rreth 16°C, fundjava do të sjellë një rritje graduale. Temperaturat e mesditës do të rikthehen sërish pranë 20°C, duke sjellë kushte më tipike pranverore.