Një aksident i rëndë ka ndodhur në një kantier ndërtimi në Vjenë, ku si pasojë kanë humbur jetën katër persona. Lajmi është konfirmuar nga Ambasada e Republikës së Kosovës në Austri, e cila ka bërë të ditur se tre prej viktimave janë shtetas të Kosovës.
Sipas informacioneve zyrtare nga autoritetet austriake, ngjarja ka ndodhur në distriktin Alsergrund. Një pjesë e konstruksionit është shembur papritur, duke zënë poshtë disa punëtorë që ndodheshin në vendin e punës.
Fillimisht u konfirmua se dy nga viktimat janë Pajtim Bajrami, 36 vjeç, Asllan Musliu, 49 vjeç.
Ndërkohë, në një përditësim të mëvonshëm, Ambasada bëri të ditur se edhe viktima e tretë është shtetas i Kosovës. Bëhet fjalë për Istref Zekaj.
Ambasada e Republikës së Kosovës në Austri ka shprehur dhimbjen e thellë dhe ngushëllimet më të sinqerta për familjet e viktimave dhe për të gjithë të prekurit nga kjo tragjedi e rëndë.
Po ashtu, është bërë e ditur se përfaqësuesit diplomatikë janë në komunikim të vazhdueshëm me autoritetet austriake dhe me familjarët e viktimave, për të ndjekur nga afër zhvillimet dhe për të ofruar mbështetjen e nevojshme në këtë situatë të vështirë.
Ambasada ka theksuar se do të vazhdojë të informojë publikun për çdo zhvillim të ri lidhur me rastin, ndërsa hetimet për shkaqet e aksidentit janë ende në zhvillim nga autoritetet përkatëse në Austri.
