Sipas sinoptikanes Tanja Porja, fundjava paraqitet kryesisht e kthjellët në të gjithë territorin shqiptar, me diell dominues dhe vetëm vranësira të lehta e kalimtare. Mëngjeset mbeten të ftohta, me temperatura që zbresin deri në 0°C në zonat malore, ndërsa në ultësirë luhaten nga 7 deri në 11°C.
Gjatë mesditës pritet një rritje e lehtë e temperaturave, ku maksimumet arrijnë deri në 17-19°C në zonat perëndimore dhe 12-15°C në zonat malore. Bregdeti mbetet kryesisht i kthjellët, ndërsa vranësira më të dukshme shfaqen në qendër dhe juglindje.
Të dielën vijon moti i qëndrueshëm me një rritje të lehtë të temperaturave, duke arritur deri në 20°C. Megjithatë, në orët e pasdites priten momente të shkurtra me reshje të pakta shiu, kryesisht në skajin jugor të vendit.
Fillimi i javës sjell rritje graduale të temperaturave, por edhe shtim të vranësirave dhe reshje të lehta, kryesisht në jug. Nga mesi i javës pritet stabilizim i kushteve atmosferike, i shoqëruar me një rënie të lehtë të temperaturave.
Në rajonin e Ballkanit, moti paraqitet kryesisht i kthjellët, ndërsa pjesa më e madhe e Europës po kalon gradualisht drejt kushteve më pranverore, me rritje të lehtë të temperaturave dhe më pak reshje.
