Një deklaratë e fortë që mban emrin e ish-banorit të “Big Brother VIP”, Artan Kola, ka qarkulluar së fundmi në rrjetet sociale, duke ngritur hije dyshimi mbi arsyet e vërteta të eliminimit të tij nga gara.
Në shkrimin e publikuar, ngrihet pretendimi se dalja e tij ka qenë e padrejtë, ndërsa zbulon biseda të supozuara me stafin e formatit përpara mbrëmjes së spektaklit.
“E di që dalja ime ishte e padrejtë. Madje, edhe vetë produksioni më kishte thënë para Prime-it se nuk isha i rrezikuar dhe se nuk duhej të shqetësohesha, sepse sipas tyre, Nikol ishte ajo që do të largohej,” lexohet në deklaratë.
Akuza më e rëndë në këtë mesazh shkon drejtpërdrejt ndaj produksionit, të cilin deklarata e bën përgjegjës dhe bashkëpunëtor në këtë plan të pretenduar, për të fshehur ngjarjen prapa një “rastësie”.
“Ajo që është edhe më e rëndë, është se produksioni ishte në dijeni të kësaj dhe ishte pro këtij veprimi, por donte që gjithçka të dukej si rastësi dhe jo si diçka e planifikuar. Ndërsa rrezikun dhe pasojat duhej t’i mbaja unë,” mbyllet deklarata që mban firmën “I juaji, Artan Kola”.
Ndërkohë pas kësaj deklarate ka ardhur reagimi i Artan Kolës në faqen zyrtare ku ka përgënjeshtruar lajmin, ndërsa e konsideron manipulim.
Menjëherë pas eliminimit të tij në spektaklin e kaluar, ish-banori zhvilloi një debat të ashpër në studio me moderatorin dhe opinionistët, duke i akuzuar publikisht se stafi i kishte zëvendësuar “Biletën e Fatit” të sponsorizuar, për t’i pamundësuar rikthimin në shtëpi.
