Ngrohje pranverore, pastaj përmbysje totale – moti ndryshon brenda pak ditësh
Shqipëria nis ditët në vijim me diell dhe temperatura në rritje, sidomos në veri dhe në qendër, ndërsa jugu mbetet me vranësira dhe ndonjë reshje të lehtë kalimtare. E mërkura dhe pjesa më e madhe e së enjtes duken të qeta, me mot stabël dhe temperatura që shkojnë mbi 20°C – tipike pranverë.
Por qetësia nuk zgjat.
Vonë të enjten një sistem i fuqishëm vranësirash godet fillimisht veriperëndimin dhe më pas përfshin gjithë vendin. Gjatë natës dhe të premten rikthehen reshjet në të gjithë territorin, me rrebeshe në zonat perëndimore dhe dëborë në zonat malore.
Rënia e temperaturave është e fortë dhe e menjëhershme. Të premten termometri bie me deri 5-6 gradë, duke rikthyer ndjesinë e dimrit, me mëngjese që zbresin deri në -2°C në zonat malore.
Edhe e shtuna nis e ftohtë dhe me mundësi për dëborë të lehtë në lindje, por situata përmirësohet shpejt. Nga pasditja e së shtunës dhe sidomos të dielën, moti stabilizohet dhe temperaturat ngjiten sërish në vlera pranverore.
Pra, nga dielli dhe mbi 20°C… në reshje dhe temperatura dimri – dhe pastaj sërish kthim në pranverë brenda pak ditësh.
