Moti në Shqipëri merr kthesë të fortë që nga kjo mbrëmje. Reshjet intensifikohen në të gjithë territorin, ndërsa në zonat malore rikthehet dëbora për shkak të rënies së ndjeshme të temperaturave.
E nesërmja do të jetë tipike dimri: shi në ultësirë, dëborë në male dhe temperatura dukshëm më të ulëta. Mëngjesi zbret deri në -2°C në zonat malore, ndërsa maksimumet nuk kalojnë 16°C. Gjatë ditës reshjet dobësohen gradualisht, por mbeten prezente.
Edhe në vijim moti mbetet i paqëndrueshëm. Të shtunën priten vetëm reshje të pakta, kryesisht dëborë në lindje dhe juglindje, ndërsa temperaturat rriten lehtë me maksimum deri në 17°C.
Fundjava sjell kthesë pozitive. E diela dhe e hëna stabilizojnë kushtet atmosferike, me mot kryesisht të kthjellët dhe rritje të temperaturave.
Por kjo qetësi nuk zgjat shumë. Të martën rikthehen reshjet e shiut, ndërsa të mërkurën pritet sërish dëborë në zonat malore, duke konfirmuar një javë me luhatje të forta mes dimrit dhe pranverës.
