Me Samiun ka kaluar plot 48 vjet martesë, prandaj Shpresa në 70 vjetorin e ditëlindjes së tij vendosi që ta surprizonte në rubrikën “Ka Një Mesazh Për Ty”. Teksa flet për përkushtimin që bashkëshorti i saj ka pasur gjithë jetën ndaj Shpresës dhe katër fëmijëve të tyre, me humor ajo tregon pak edhe për karakterin e njëri-tjetrit.
Dhe ç’është e vërteta… janë dy të kundërta që tërhiqen dhe nuk bëjnë dot pa njëra-tjetrën. Ajo një grua luftarake, nevrike dhe tejet strikte dhe ai një burrë i urtë, i dashur dhe zemërmirë.
Shpresa tregon se dëshiron t’i kërkojë falje publike bashkëshortit të saj, për të gjitha rastet kur e ka mërzitur, kur ia ka “nxirë” për shkak të xhelozisë.
Ardit Gjebrea: Me karaktere si jeni me njëri-tjetrin?
Shpresa: Aty ndryshojmë! Unë jam shumë nevrike, jam tepër strikte, kurse ai gjithmonë më jep shpresë, më jep zemër, më jep kurajo. Gjithmonë është shumë qetësues. Nëse në shtëpi femra duhet të jetë dielli i shtëpisë, në familjen time është burri dielli i shtëpisë. Meriton shumë!
Ardit Gjebrea: Je bërë ndonjëherë xheloze për të?
Shpresa: Shumë! Sepse ai është më i mirë nga të gjitha anët, është shumë më i mirë se unë. Ai është i kompletuar me gjithë të mirat. Unë jam shumë nevrike. https://www.youtube.com/embed/56TD1BOaQ_8
Ardit Gjebrea: Ngaqë ai kishte një zemër të mirë, ti u bëre xheloz prej zemrës së mirë?
Shpresa: Edhe kjo ndikon! Të them të drejtën ia kam nxirë, kam qenë shumë xheloze!
Ardit Gjebrea: Po çfarë të thoshte ai?
Shpresa: Ai vetëm më qetësonte, më thoshte ne jemi bashkë gjithmonë, kemi familjen e rregullt dhe çdo gjë. Unë aty. Tani ngaqë ai bën 70 vjeç, unë dua që t’i kërkoj falje për të gjithë shqetësimet që i kam sjellë në jetë.
