Moti në vend vijon i qëndrueshëm, me kthjellime dhe vranësira kalimtare, por sinjalet për ndryshim janë të dukshme. Gjatë natës dhe ditës së nesërme, vranësirat shtohen kryesisht në juglindje, ndërsa pjesa perëndimore dhe bregdeti mbeten më të hapura dhe me diell.
Temperaturat pësojnë një rënie të lehtë. Mëngjesi zbret deri në 2°C në zonat malore dhe rreth 12°C në bregdet, ndërsa mesdita arrin maksimumet deri në 21°C në ultësirën perëndimore. Era forcohet gradualisht, duke arritur deri në 50 km/h.
Në vijim, tabloja mbetet pothuajse e njëjtë për disa ditë radhazi: kthjellime të pjesshme dhe vranësira më të dukshme në gjysmën lindore të vendit, ndërsa bregdeti mbetet më i favorizuar nga dielli.
Fundjava pritet të jetë më e freskët, sidomos në mëngjes dhe gjatë natës. Në zonat malore temperaturat zbresin në vlera afër zeros apo edhe lehtësisht negative, ndërsa maksimumet gjatë ditës nuk kalojnë 19-20°C.
Ndryshimi vjen në fillim të javës tjetër. E hëna dhe e marta sjellin rritje të ndjeshme të temperaturave, me maksimumet që rikthehen në 23-24°C, duke rikthyer sërish ndjesinë e pranverës në të gjithë territorin.
