Shtetet e Bashkuara kanë njoftuar se “nuk kanë arritur një marrëveshje” me Iranin. Këtë e deklaroi zëvendëspresidenti amerikan J.D. Vance.
Sipas Vance, “nuk ka një premtim përfundimtar nga Irani për heqjen dorë nga arma bërthamore”. Ai bëri të ditur se do të kthehet në SHBA pasi i paraqiti Iranit “një ofertë përfundimtare dhe më të mirën e mundshme”.
Teherani reagoi duke i quajtur “kërkesa të paarsyeshme”. Njoftimi i Vance erdhi nga Islamabadi në mes të natës dhe tronditi botën: “Shtetet e Bashkuara nuk kanë arritur një marrëveshje me Iranin”.
Sipas zëvendëspresidentit amerikan, i cili tashmë është larguar nga Pakistani, “nuk ka premtim nga Irani për të hequr dorë përfundimisht nga arma bërthamore”. Ndërsa Teherani thotë se “negociatat kanë dështuar për shkak të kërkesave të paarsyeshme të SHBA-së”, por shton se “askush nuk priste një marrëveshje që në raundin e parë të negociatave”.
Pakistani u ka bërë thirrje Shteteve të Bashkuara dhe Iranit të respektojnë gjithsesi armëpushimin.
Ngushtica e Hormuzit, Libani, çështja bërthamore, sanksionet, asetet e ngrira dhe dëmshpërblimet e luftës: këto janë pengesat kryesore që kanë bllokuar marrëveshjen.
Dy anije luftarake amerikane ndodhen në Ngushticën e Hormuzit, por Irani i mohon pretendimet e SHBA-së. Pasdaranët paralajmërojnë: “Do të veprojmë ashpër ndaj anijeve ushtarake që kalojnë në Hormuz.”
