Një hajdut në Britani është dënuar me mbi dy vite burg pasi vodhi një çantë dore që përmbante sende luksi me vlerë deri në 2.5 milionë euro, përfshirë një vezë të çmuar Fabergé të zbukuruar me smeraldë dhe një orë të rrallë.
Ngjarja ndodhi më 7 nëntor 2024 në një lokal në zonën Soho të Londrës, ku 29-vjeçari Enzo Conticello, i njohur edhe si Hakin Boudjenoune, mori çantën e Rosie Dawson, e cila e kishte vendosur pranë këmbëve të saj jashtë një pub-i.
Sendet e vlefshme ndodheshin në çantë pasi Dawson i kishte përdorur më herët gjatë një eventi pune. Ato nuk janë gjetur ende nga autoritetet.
Në gjykatën e Southwark, Conticello pranoi fajësinë për vjedhje dhe mashtrim. Pamjet filmike treguan se ai fillimisht tentoi të vidhte një tjetër çantë brenda lokalit, përpara se të merrte atë të Dawson jashtë.
Sipas prokurorisë, ai veproi për “para të shpejta” dhe më pas ia dorëzoi çantën dikujt tjetër për të siguruar drogë. Ai u identifikua pasi tentoi të përdorte kartat bankare të viktimës vetëm pak minuta pas vjedhjes.
Avokatja e tij deklaroi se ai nuk ishte në dijeni të vlerës reale të objekteve dhe se kishte rënë në varësi nga droga pas humbjes së punës gjatë pandemisë.
Duke dhënë dënimin prej dy vitesh e tre muajsh burg, gjykata theksoi se vjedhja kishte shkaktuar stres dhe pasoja të mëdha për viktimën dhe kompaninë e saj. Ndërkohë, policia vijon kërkimet për gjetjen e sendeve të vjedhura.
