Një ditë më parë Tirana u përball me pamje të frikshme! Një nga pallatet e kompleksit “Arlis”, pranë Farmacia 10, në pronësi të biznesmenit Armand Lilo, u përfshi nga flakët e një zjarri të përmasave të mëdha.
Në një situatë që për pak çaste u kthye në ankth për dhjetëra familje, heronjtë e vërtetë u bënë zjarrfikësit, të cilët në krye të detyrës, sakrifikuan pa hezitim, duke mos marrë parasysh rrezikun që u kanosej jetës së tyre, vetëm për të shpëtuar qytetarët e bllokuar mes flakëve përbindëshe.
Mes tymit të dendur dhe copëzave të fasadës që shkëputeshin nga ndërtesa, një prej momenteve më prekëse ishte ai i një zjarrfikësi që, edhe pse i papajisur plotësisht me uniformën dhe mjetet mbrojtëse, vendosi të hyjë në flakë për të shpëtuar një qytetare. Ai kishte vetëm një kokore në kokë, të cilën, pa u menduar dy herë, ia vendosi gruas së rrezikuar, duke e mbrojtur me trupin e tij. E kemi fjalën për shefin e Stacionit të Zjarrfikëses Kinostudio, Jonus Murataj, i cili përpos se i vendosi kokoren e tij qytetares, i dha dhe një përqafim për t’i dhënë forcë dhe për t’i treguar që jeta e saj tanimë është e sigurt.
*Momenti kur Jonus Murataj ia ka vendosur kokoren qytetares dhe e ndihmon që të shkoje te zjarrfikësi
Video Player
E ndërsa qytetarët ndiqnin me ankth ngjarjen dhe shpresonin që flakët të neutralizoheshin shpejt, familjarët e zjarrfikësve përjetonin një tjetër “betejë”, ata qëndronin me zemrën në dorë për fatin e të afërmve të tyre në vijën e parë.
Ka qenë vajza e Jonus Muratajt, Françeska Murataj, e njohur në rrjetin social “TiktTok”, ajo e cila publikoi pamjet e momentit kur i ati u fut mes flakëve dhe shpëtoi qytetarën.
“E pashë me një frymë këtë video dhe zemra po më rrihte fort. Jam shumë e lumtur që zonja e moshuar ka shpëtuar edhe pse situata ishte shumë e vështirë, por më shumë më dhemb zemra për zjarrfikësin pa uniformë duke mbrojtur me trupin e tij zonjën dhe që në këtë rast zjarrfikësi është babai im. Nuk është hera ime e parë në jetë që shikoj babain në momente të tilla, por shpresoj të jetë e fundit”, shkruan ajo.
