Moti në vend mbetet i paqëndrueshëm, por pa episode të forta reshjesh. Vranësirat do të jenë prezente në të gjithë territorin, ndërsa reshjet do të jenë të pakta dhe kryesisht të përqendruara në zonat lindore.
Gjatë ditës së sotme, reshjet shfaqen në formë të dobët dhe afatshkurtër, fillimisht në lindje dhe më pas edhe në disa zona qendrore gjatë pasdites. Pjesa më e madhe e perëndimit dhe bregdetit mbeten pa reshje. Temperaturat arrijnë maksimumet 26-27°C.
Edhe dita e nesërme vijon në të njëjtën linjë, por me reshje edhe më të pakta. Pikat e shiut do të jenë të izoluara dhe kryesisht në juglindje, në zonën nga Peshkopia deri në Devoll. Ndërkohë, pjesa tjetër e vendit, sidomos bregdeti dhe ultësira perëndimore, do të dominohen nga kthjellime dhe vranësira kalimtare.
Nga mesi i javës pritet një stabilizim gradual i kushteve atmosferike. Reshjet mbeten sporadike dhe të papërfillshme, ndërsa fundjava sjell më shumë diell, veçanërisht në zonat perëndimore. Megjithatë, në lindje nuk përjashtohen vranësira më të dendura dhe ndonjë reshje e izoluar.
Temperaturat do të pësojnë një rënie të lehtë dhe graduale. Gjatë fundjavës maksimumet zbresin në 24-26°C, ndërsa në fillim të javës tjetër pritet një tjetër freskim, me maksimumet që bien në 22-23°C dhe minimumet që në zonat malore afrohen pranë 0°C.
Në përmbledhje: reshje të pakta, vranësira të shpeshta dhe një rënie graduale e temperaturave, me një stabilizim të përkohshëm në fundjavë përpara një tjetër ndryshimi në fillim të javës tjetër.
