Të miturit hedhin një copë letër mbi disa kuti kartoni të vendosura jashtë marketit dhe largohen menjëherë nga vendngjarja. Vetëm pak minuta më vonë, në të njëjtin vend shfaqet tym, i cili në një kohë shumë të shkurtër shndërrohet në flakë, duke u përhapur me shpejtësi në fasadën e pallatit.
Detaje të reja kanë dalë në dritë nga zjarri i fuqishëm që përfshiu një pallat 12-katësh në kompleksin “Arlis”, pranë QSUT në Tiranë. Sipas hetimeve, kamerat e sigurisë të bizneseve përreth kanë fiksuar momentet para shpërthimit të flakëve, ku shfaqen pesë të mitur që qëndrojnë për disa minuta pas një marketi. Dy prej tyre largohen duke mbajtur një objekt të dyshuar si letër dhe e hedhin mbi disa kuti kartoni jashtë ambienteve, përpara se të largohen nga vendi.
Pak minuta më vonë, në të njëjtin vend shfaqet tym, i cili përhapet me shpejtësi dhe shndërrohet në flakë që kapin fasadën e pallatit, duke shkaktuar dëme të konsiderueshme materiale. Hetuesit dyshojnë se zjarri mund të jetë shkaktuar nga pakujdesia, ndërsa po verifikohen të gjitha rrethanat që çuan në përhapjen e tij kaq të shpejtë.
Në lidhje me ngjarjen, policia ka arrestuar katër persona: administratorin e kompleksit Agron Cara, inxhinierin Enver Ademi dhe administratorin e firmës së fasadës Altin Furtuna për shkelje të rregullave të mbrojtjes në punë, si dhe menaxheren e marketit Razie Sula për shkatërrim prone nga pakujdesia dhe shkelje të rregullave në punë. Ndërkohë, nën hetim janë vendosur edhe pronari i kompleksit Armand Lilo, një i kontraktuar për ndërtimin si dhe dy punonjëse të marketit, teksa vijojnë verifikimet për përgjegjësitë konkrete të secilit.
