Moti në vend nis i qëndrueshëm, me diell dhe temperatura relativisht të larta. Sot, mesdita sjell maksimumet deri në 22–23°C, ndërsa kthjellimet mbizotërojnë në të gjithë territorin.
Edhe dita e nesërme vijon në të njëjtën linjë: mot i kthjellët, me vranësira të lehta dhe kalimtare kryesisht në zonat lindore, por pa reshje. E shtuna dhe e diela mbeten të qeta nga ana atmosferike, megjithëse të dielën pritet një shtim i vranësirave, pa sjellë reshje.
Ndryshimi nis në fillim të javës tjetër. Nga e hëna deri të mërkurën rikthehen reshjet, por në formë lokale dhe afatshkurtër. Nuk priten sasi të mëdha shiu, por më tepër episode të shkurtra në zona të ndryshme të vendit.
Temperaturat ndërkohë janë në rritje. Që nga dita e nesërme, maksimumet ngjiten në rreth 24°C dhe vijojnë të rriten lehtë edhe të dielën. Në fillim të javës tjetër, pavarësisht vranësirave dhe reshjeve, temperaturat mbeten të larta, me maksimumet që arrijnë 25–26°C në pjesën më të madhe të territorit.
Në mëngjes, vlerat mbeten më të freskëta në zonat malore, por në ultësirë dhe bregdet rriten ndjeshëm, duke arritur deri në 13–15°C.
Në përmbledhje: fundjavë me diell dhe stabilitet, ndërsa java nis me reshje të lehta lokale, por pa ulur ndjeshëm temperaturat, të cilat mbeten tipike pranverore.
