Një ngjarje e rëndë është regjistruar në Greqi, ku një shtetas shqiptar është gjetur i pajetë në një stallë bagëtish në zonën e Kalamatës. Sipas mediave greke, rasti ka ndodhur në vendin e quajtur Burnia.
Viktima dyshohet se është qëlluar me armë gjahu nga një distancë e afërt, duke pësuar plagë fatale në kokë. Ai punonte në stallën e lopëve ku është gjetur pa shenja jete.
Autoritetet greke kanë nisur hetimet për zbardhjen e plotë të ngjarjes, ndërsa pronari grek i stallës është shpallur në kërkim si person i dyshuar në lidhje me vrasjen.
Ende nuk janë bërë të ditura motivet e mundshme të krimit, ndërsa policia greke po vijon kërkimet në terren dhe mbledhjen e provave materiale për të përcaktuar rrethanat e sakta të ngjarjes.
Hetimet pritet të sqarojnë në vijim dinamikën e plotë të konfliktit dhe rolin e personave të përfshirë.
