Deputeti i Partisë Socialiste, Erion Braçe, ka reaguar në rrjetet sociale lidhur me radhët e gjata të pensionistëve për të marrë abonetë falas në Tiranë, duke ngritur shqetësimin për kushtet dhe kohën e pritjes.
Në postimin e tij, Braçe ka publikuar pamje ku të moshuarit shfaqen duke pritur në radhë për më shumë se një orë, situatë që sipas tij përsëritet çdo fundmuaji. Ai e cilëson këtë praktikë të papërshtatshme dhe jo dinjitoze për këtë kategori.
Deputeti thekson se politika e ofrimit të aboneve falas është pozitive, por mënyra e zbatimit kërkon përmirësim. Sipas tij, institucionet duhet të marrin masa për të shmangur radhët dhe për të garantuar një proces më të organizuar.
Braçe propozon që abonetë t’u jepen pensionistëve një herë në vit, përmes një sistemi të integruar që do të reduktonte fluksin dhe do të parandalonte abuzimet, duke siguruar një trajtim më dinjitoz për të moshuarit.
Postimi i Braçes
TURPI NË ÇDO RRUGË TË TIRANËS;
RRADHA PËR ABONE FALAS E TË MOSHUARVE!
Më erdhi turp të shkoja më afër, sinqerisht;
Kanë që në mëngjes në radhë apo kjo radhë!
Falë pemëve këtu ka hije, lehtësim për të sëmurët mes tyre;
Por në këmbë më shumë se një orë është tuuuuurpppp!
Dhe kjo është e përmuajshme, çdo fund muaji si vuajtje e këtyre njerëzve!
DUHET THJESHT TË MENDOSH, DËGJOSH, VENDOSËSH;
Është politikë e bashkisë aboneja falas dhe është një politikë shumë e mirë. Por kaq nuk mjafton: JEPE ME DINJITET!
Një sistem i integruar edhe me sisteme të tjera për të eliminuar abuzimin, DUKE E DHËNË NJË HERË NË VIT PËR SECILIN DHE NË KUSHTE TË TJERA!
