Sinoptikania e MeteoAlb, Lajda Porja, ka bërë të ditur se vendi po përgatitet për një rritje të ndjeshme të temperaturave gjatë ditëve në vijim, duke sjellë një valë të nxehti tipike verore në pranverë.
Sipas parashikimeve, java ka nisur me temperatura relativisht të buta, rreth 24°C, por nga e mërkura pritet një rritje graduale deri në 27°C, ndërsa kulmi i të nxehtit do të arrihet gjatë fundjavës.
Porja theksoi se të premten dhe fundjavën termometri do të arrijë në 29–30°C në pjesën më të madhe të Ultësira Perëndimore, ndërsa në zona si Elbasani, Berati dhe Gjirokastra temperaturat mund të shkojnë deri në 31°C.
Në zonat malore, minimalet pritet të zbresin deri në 9–10°C në orët e para të mëngjesit, ndërsa gjatë mesjavës parashikohen vranësira të herëpashershme në veri dhe verilindje të vendit, me reshje të izoluara shiu.
Sipas MeteoAlb, fundjava do të karakterizohet nga mot i qëndrueshëm, kryesisht i kthjellët dhe më i ngrohtë se çdo fundjavë tjetër e pranverës deri më tani.
