Pak ditë pas tragjedisë në Durrës, një tjetër aksident trondit të njëjtën zonë, Spitallën
Një tjetër aksident rrugor është regjistruar në lagjen 15 të Durrësit, në segmentin që lidh zonën e Spitallës me Porto Romanon, vetëm pak ditë pas ngjarjes tragjike ku humbën jetën dy të mitur.
Sipas informacioneve paraprake, një automjet ka humbur kontrollin gjatë lëvizjes dhe është përmbysur në rrugë. Në mjet ndodheshin drejtuesi i automjetit dhe babai i tij, i cili udhëtonte si pasagjer.
Të dy janë transportuar menjëherë në spital për ndihmë mjekësore dhe, fatmirësisht, ndodhen jashtë rrezikut për jetën.
Ngjarja rikthen vëmendjen te aksidenti i rëndë i ndodhur pak ditë më parë në të njëjtën zonë, ku humbën jetën dy të mitur dhe u plagos rëndë një tjetër. Për atë ngjarje, autoritetet dyshojnë se shtetasi Nikoll Radaçi drejtonte automjetin në gjendje të dehur.
Policia po heton rrethanat e aksidentit të fundit dhe shkaqet që çuan në humbjen e kontrollit të mjetit.
