Ilir Meta është komentuar sërish për një gjest të bërë gjatë seancës në Gjykata e Posaçme Kundër Korrupsionit dhe Krimit të Organizuar, i cili u interpretua në rrjetet sociale si simboli i numrit “7”.
Avokati i tij, Kujtim Cakrani, ka sqaruar se bëhet fjalë për një keqinterpretim, duke thënë se Meta ka bërë simbolin e shqiponjës dhe jo numrin 7.
“Nuk bëri simbolin 7. Bëri shqiponjën. Nuk ka përvjetor”, u shpreh Cakrani, duke shtuar se Meta është në gjendje të mirë fizike dhe mendore.
“Është në lartësinë që e kërkon funksioni i tij si kryetar i PL-së. Ishte mirë nga ana fizike, i palestruar edhe nga ana mendore”, tha avokati.
Edhe ish-bashkëshortja e tij, Monika Kryemadhi, ka deklaruar se Meta është në “top formë”, duke komentuar edhe kushtet gjatë seancës gjyqësore dhe zhvillimet në dosjen hetimore.
Ajo tha se një episod gjatë procesit ishte edhe rrjedhja e ujit nga kondicioneri në sallën e gjyqit, ndërsa përsëriti qëndrimin se çështja ndaj saj dhe Metës është politike.
“Gjyqi është politik dhe ne që kemi qenë edhe shkaktarët e Reformës në Drejtësi, do paguajmë faturat tona”, u shpreh Kryemadhi.
Ajo komentoi gjithashtu edhe hetimet ndaj familjarëve dhe personave të përfshirë në dosje, duke i cilësuar disa prej akuzave si të pabazuara.
Në deklaratat e saj, Kryemadhi iu referua edhe shpenzimeve familjare të përfshira në hetim, duke thënë se ato kanë qenë të deklaruara dhe të lidhura me trajtime shëndetësore.
“Ilir Meta është top formë… unë jam si të verbërit, me dorë e njoh Ilir Metën”, u shpreh ajo gjatë prononcimit për mediat.
