Një ngjarje tragjike është regjistruar në Maldive, ku pesë turistë italianë kanë humbur jetën gjatë një zhytjeje në ujërat pranë zonës së Alimathaa. Mes viktimave raportohet të jetë edhe një studiues nga Xhenova.
Sipas mediave të huaja, turistët u shpallën të zhdukur gjatë paradites, çka bëri që autoritetet vendase të nisnin menjëherë një operacion kërkim-shpëtimi. Trupat e pajetë të pesë personave u gjetën pak më vonë.
Raportohet se viktimat ndodheshin në një anije private të dedikuar për zhytje dhe kishin hyrë në ujë gjatë orëve të mëngjesit. Megjithatë, ata nuk dolën më në sipërfaqe deri në mesditë, duke alarmuar ekuipazhin e mjetit lundrues, i cili njoftoi autoritetet.
Policia maldiviane ka nisur hetimet për zbardhjen e plotë të rrethanave të ngjarjes, ndërsa shkaqet e sakta të tragjedisë mbeten ende të paqarta.
