Familjarët e Xhuana Nikolli vijojnë të kërkojnë drejtësi pas vdekjes tragjike të së resë, e cila i dha fund jetës duke konsumuar fotoksinë, ndërsa ish-bashkëshorti i saj, Eraldo Fizi, vijon të jetë në kërkim nga autoritetet.
Në një rrëfim prekës, motra e saj, Marjana Kalaj, e përshkroi Xhuanën si një vajzë të dashur dhe zemërgjerë, e cila, sipas saj, jetonte për dashurinë ndaj ish-bashkëshortit.
“Ishte një vajzë e ëmbël, e qeshur dhe shumë e ndjeshme. Kishte një dashuri të madhe për ish-bashkëshortin, por ajo dashuri nuk iu kthye kurrë. Ishte një yll që lindi në dashuri, por u fik në dhunë”, u shpreh ajo.
Sipas familjarëve, martesa mes Xhuana Nikolli dhe Eraldo Fizi kishte nisur më 9 qershor 2025, pas një njohjeje që datonte që nga vitet e gjimnazit. Megjithatë, marrëdhënia mes tyre zgjati vetëm tre muaj, ndërsa më pas e reja u largua nga banesa bashkëshortore në Lezhë dhe u zhvendos fillimisht në Tiranë.
Familja ngre një sërë pikëpyetjesh mbi rrethanat që çuan në vetëvrasjen e saj, duke kërkuar zbardhjen e plotë të ngjarjes dhe hetim të detajuar mbi orët e fundit të jetës së Xhuanës.
Një prej çështjeve që mbetet ende e paqartë, sipas familjarëve, është mënyra se si e reja siguroi lëndën toksike fotoksinë, e cila përdoret zakonisht në sektorin industrial dhe bujqësor dhe për të cilën kërkohen autorizime të posaçme.
Ndërkohë, nga aktet e ekspertimit të Mjekësisë Ligjore rezulton se shkaku i vdekjes ka qenë konsumimi i fotoksinës, ndërsa në trupin e saj janë konstatuar edhe shenja dhune.
Eraldo Fizi është shpallur në kërkim që prej 10 marsit, nën akuzat për “Dhunë në familje” dhe “Shkaktim vetëvrasjeje”, por deri më tani ai nuk është arrestuar.
Në fund të rrëfimit të saj, Marjana Kalaj i drejtoi një mesazh të fortë ish-bashkëshortit të motrës së saj.
“Pse e dhunove motrën tonë? Ajo meritonte të jetonte dhe të ishte e lumtur. Kudo që të fshihesh, një ditë do të dalësh përpara drejtësisë dhe do të paguash për atë që ke bërë”, u shpreh ajo.
Familja apelon ndaj institucioneve ligjzbatuese për arrestimin sa më të shpejtë të Eraldo Fizi dhe për një hetim të plotë të ngjarjes, duke e konsideruar rastin e Xhuanës si një alarm për shoqërinë dhe dhunën ndaj grave.
