Saimir Vishaj është një ndër figurat më të njohura të botës juridike në Shqipëri. Një emër që për vite me radhë u identifikua me debatet e forta publike, qëndrimet e drejtpërdrejta dhe përballjen pa kompromis me padrejtësinë. Në çdo dalje publike, ai ka qëndruar i palëkundur në bindjen e tij, i vendosur për të mos heshtur përballë asaj që e konsideron të padrejtë.
Por jeta e vendosi avokatin përballë një beteje edhe më të fortë se sallat e gjyqit. Një sëmundje tumorale, e cila e bëri të shkëputej për pak kohë, për t’u rikthyer sërish më i fortë.
Së fundmi, ftuar në Mes’Dritë në Vizion Plus, ai ka zgjedhur të flasë përtej petkut profesional, duke rrëfyer problemet me shëndetin, rikthimin në profesion, por edhe një sfidë tjetër, përballjen me vetminë dhe ndarjen, për të cilën ka folur hapur edhe në rrjetet sociale.
“Familjarët në momente të caktuara kur t’i bie keq të gjithë të braktisin. Ndihesh vërtetë i vetmuar, nga familja, nga fëmijët nga të gjithë. Kjo ta shton më shumë rëndesën e sëmundjes. Ndërkohë mjekët më kanë porositur ta marr jetën me optimizën. kam përballuar tre kimioterapi dhe tre gjendje kome, ku isha gati i vdekur. Por është ajo shprehja që jetëgjati nuk bëhet jatë shkurtër.”
Avokati u ndal edhe te marrëdhënia familjare me fëmijët e ish-bashkëshorten.
“Me fëmijët komunikoj, por largësia është largësi. Djemtë kanë aktivitetet e tyre në SHBA, ndërsa bashkëshortja nuk e përballoi dot ikjen e tyre, por edhe ambienti në Shqipëri u bë mbytës. Ne e quajmë këtë “gjenocid”; nëse serbi i përzuri kosovarët me forcë, kjo qeveri po përdor mënyra psikologjike dhe ekonomike për t’i detyruar njerëzit të largohen. Po ikën truri i kombit. Nusja ime ishte mjeke kirurge me 40 vjet punë dhe nuk e gjeti dot veten këtu.
Përsa i përket divorcit dhe stuatusit të tij në rrjetet sociale ku njoftoi ndarjen, avokati tha se ish-bashkëshortja e tij nuk bëri asnjë reagim.
“Me ish-bashkëshorten nuk kam komunikuar më që pas divorcit, ndonëse fëmijët kërkojnë që të bëhemi bashkë sërish. Edhe sot duan që unë t’u bashkohem në SHBA. Kjo ndarje nuk është një ndarje familjeje, i vetmi shkak u bë ambienti që na rrethon. Divorci është legalizuar në gjykatë, por është e trishtë pas 40 viteve njohje që nga bankat e shkollës”, u shpreh ai.
