Në vitin e ri shkollor 2026–2027, nxënësit e klasave të para, të gjashta dhe të dhjeta do të mësojnë me kurrikula të reja, të përditësuara nga institucionet përgjegjëse të arsimit.
Ministrja e Arsimit, Mirela Kumbaro, bëri të ditur se programet e reja lëndore janë publikuar nga Agjencia e Sigurimit të Cilësisë së Arsimit Parauniversitar dhe tashmë janë në dispozicion të shkollave dhe mësuesve.
Sipas saj, këto ndryshime përbëjnë një hap të rëndësishëm drejt përmirësimit të cilësisë së mësimdhënies dhe procesit të të nxënit në arsimin parauniversitar.
Kumbaro u bëri thirrje drejtuesve të shkollave dhe mësuesve që të njihen në detaje me programet e reja, të cilat sjellin qasje dhe orientime të përditësuara në praktikën mësimore.
Ajo theksoi gjithashtu se trajnimi i mësuesve, i zhvilluar në kuadër të Programit Kombëtar për Zhvillimin Profesional të Mësuesve, është përqendruar pikërisht në zbatimin e këtyre kurrikulave të reja.
Ministrja nënvizoi se pjesëmarrja aktive e mësuesve në trajnimet profesionale është thelbësore për zbatimin e suksesshëm të reformës në klasë, duke shtuar se synimi është një vit shkollor me më shumë cilësi dhe profesionalizëm në mësimdhënie.