Shqipëria drejt një udhëkryqi demografik: Popullsia u pakësua me 12 persona për 1,000 banorë në 2024
Të dhënat më të fundit të Eurostat tregojnë se popullsia e Shqipërisë u reduktua me 12 persona për çdo 1,000 banorë gjatë vitit 2024, duke e renditur vendin me ritmet më të larta të tkurrjes në Europë në kohë paqeje. Kjo përkon me humbjen e rreth 29,000 banorëve vetëm nga emigrimi, një fenomen i pashembullt krahasuar me mesataren e Bashkimit Europian, ku popullsia rritet me rreth 5 persona për 1,000 banorë.
Ndryshe nga vendet e Europës Qendrore dhe Lindore, të cilat kanë arritur të stabilizojnë dhe madje rrisin popullsinë përmes migrimit neto pozitiv dhe politikave mbështetëse për familjet e reja, Shqipëria po përjeton një tkurrje të dyfishtë: rënien e lindshmërisë dhe largimin e të rinjve.
Në rajonin e Ballkanit Perëndimor, vendi ynë është në zonën më të nxehtë të krizës demografike. Serbia, për shembull, ka treguar qëndrueshmëri më të lartë, ndërsa Shqipëria vazhdon të humbasë krahun e punës dhe të përshpejtojë plakjen e popullsisë.
Ekspertët theksojnë se vendet si Polonia, Hungaria, Estonia dhe Lituania kanë përdorur politika të kombinuara për të frenuar emigrimin dhe për të tërhequr profesionistë të huaj dhe qytetarë të kthyer, duke krijuar një ekonomi më të qëndrueshme. Ndërsa Kroacia, pas anëtarësimit në BE, ka stabilizuar forcën punëtore përmes investimeve në infrastrukturë dhe teknologji.
Shqipëria, e orientuar kryesisht drejt turizmit, nuk po arrin të ndalë largimin e popullsisë. Ekspertët vlerësojnë se vendi duhet të zhvillojë politika efektive që e bëjnë jetesën më tërheqëse për të rinjtë dhe profesionistët që largohen, duke mësuar nga modeli i vendeve lindore që e kanë kthyer emigrimin në një mundësi për zhvillim.
