Skip to content

Hyrja në BE shoqërohet me rritjen e siguracionit të makinave

    Përafrimi i legjislacionit shqiptar me standardet e Bashkimit Evropian pritet të sjellë rritje të ndjeshme të kostos së siguracionit të detyrueshëm për automjetet.

    Autoriteti i Mbikëqyrjes Financiare ka propozuar ndryshime në ligjin për sigurimin e detyrueshëm në sektorin e transportit, duke rritur ndjeshëm limitet e dëmshpërblimit që kompanitë e sigurimit duhet të mbulojnë për çdo ngjarje.

    Sipas draftit të ri, vlera limit për çdo ngjarje sigurimi do të arrijë në 6.45 milionë euro, ndërsa aktualisht për shumicën e automjeteve private limiti është rreth 55 milionë lekë.

    Eksperti i ekonomisë, Ersuin Shehu, deklaroi se ndryshimi do të ndikojë drejtpërdrejt në çmimin e siguracionit për drejtuesit e mjeteve.

    “Çmimi i sigurimit të detyrueshëm të mjetit do të jetë më i lartë nga sa është sot”, u shpreh ai.

    Sipas projektligjit, efektet e plota të ndryshimeve do të hyjnë në fuqi pas anëtarësimit të Shqipërisë në Bashkimin Evropian.

    Drafti parashikon gjithashtu përdorimin e sistemeve elektronike për lidhjen e kontratave të sigurimit, të cilat do të kenë të njëjtën vlefshmëri ligjore si kontratat me shkrim.