Dëshmi të forta dhe rrëqethëse vijnë nga banorët e Mengëlit në Elbasan, të cilët u bënë sot dëshmitarë të aksidentit tragjik ku humbi jetën një fëmijë 7-vjeçar në aksin rrugor Elbasan–Librazhd.
Sipas banorëve të zonës, automjeti që përplasi të miturin po lëvizte me shpejtësi pranë shkollës, një segment që prej kohësh konsiderohet problematik dhe i rrezikshëm për nxënësit dhe këmbësorët. Një grua, e cila ka biznesin pranë vendit të ngjarjes, tregoi se aty mungojnë kushtet e sigurisë dhe se automjetet kalojnë shpesh me shpejtësi të lartë.
“Dolën burrat me vrap nga lokali, ngritën makinën dhe nxorën fëmijën. Njoftuan ambulancën, u vonua 15 minuta, nuk erdhi. E morën fëmijën me makinë të rastit. Nuk e llogaris dot se sa aksidente janë bërë. Ka shumë aksidente në këtë aks. Bëhen shumë. Shoferi ishte me shpejtësi maksimale. E kishte parë dikush. Ai ishte shumë shpejt.”, tha zonja.
Nga të dhënat paraprake mësohet se 7-vjeçari po kalonte rrugën për të shkuar në shkollë, kur u përplas nga një automjet. Ngjarja e rëndë ndodhi në sy të nënës së tij, ndërsa dyshohet se i mituri i është shkëputur nga dora në momentin kur ka tentuar të kalojë në anën tjetër të rrugës.
Shoferi i automjetit, një 61-vjeçar me inicialet P.B., është shoqëruar nga policia për veprime të mëtejshme procedurale.
Në vendngjarje mbërritën efektivët e policisë dhe grupi hetimor, të cilët po punojnë për zbardhjen e plotë të rrethanave të aksidentit tragjik. Ndërkohë, banorët kërkojnë ndërhyrje urgjente për shtimin e masave të sigurisë pranë shkollës, pasi sipas tyre mungesa e infrastrukturës për këmbësorët dhe shpejtësia e automjeteve po kthehen në rrezik të përditshëm për fëmijët.
Një tjetër dëshmitar i ngjarjes deklaroi se pas aksidentit një i ri nxori me kujdes fëmijën nga poshtë makinës, ndërsa shoferi shprehej se ndodhej në rrugë nacionale dhe kishte përparësi. Banori theksoi gjithashtu se automjetet në këtë aks lëvizin shpesh me shpejtësi të lartë, duke e bërë zonën të rrezikshme për banorët dhe nxënësit e shkollës pranë rrugës.
