Shefi i inteligjencës çeke ka dhënë alarmin për një rrezik të mundshëm ndaj vendeve të NATO-s, duke paralajmëruar se skenari më i besueshëm nuk është një pushtim masiv rus në Europë, por një sulm i kufizuar ndaj një shteti anëtar të aleancës.
Qëllimi i Moskës, sipas tij, është të testojë reagimin dhe unitetin e NATO-s. Kreu i Shërbimit Çek të Informacionit të Sigurisë (BIS), Michal Koudelka, pohoi përpara Dhomës së Deputetëve të Çekisë se vendet baltike mund të jenë ndër objektivat më të rrezikuara nga një provokim i tillë.
Koudelka theksoi se Europa aktualisht nuk përballet me një kërcënim të drejtpërdrejtë për një luftë të gjerë si ajo që Rusia zhvillon në Ukrainë, por ekziston rreziku i një operacioni të kufizuar ushtarak apo hibrid, i projektuar për të vënë në provë gatishmërinë dhe solidaritetin e aleancës perëndimore.
Ai shtoi se vetëm një qëndrim i qartë dhe i bashkuar i vendeve të NATO-s mund të shërbejë si pengesë ndaj ambicieve të Moskës. Më tej, theksoi se Perëndimi duhet të tregojë vendosmëri të plotë për të mbrojtur territorin dhe aleatët e tij, duke argumentuar se kjo është mënyra e vetme për të dekurajuar çdo aventurë të rrezikshme nga Rusia.
Në të njëjtën kohë, shefi i inteligjencës çeke paralajmëroi edhe kundër dy ekstremeve: besimit të verbër ndaj deklaratave ruse dhe reagimeve të ekzagjeruara nga ana e Perëndimit. Ai kërkoi që situata të analizohet me qetësi, realizëm dhe gjakftohtësi, duke shmangur panikun, por pa nënvlerësuar rreziqet që mund të shfaqen në të ardhmen.
Deklaratat e tij vijnë në një moment delikat për aleancën, kur Donald Trump ka kërcënuar me distancim nga NATO dhe SHBA po redukton angazhimin në Europë. Analistët paralajmërojnë se Moska mund të përpiqet të testojë unitetin dhe gatishmërinë e aleancës në një moment që perceptohet si dobësi politike e Perëndimit./tch/
