Dron rus godet një pallat në Rumani, plagosen dy persona. Rumania e quajti ndërhyrjen, së bashku me shkeljen e hapësirës së saj ajrore, “një përshkallëzim serioz dhe të papërgjegjshëm
Një dron rus u rrëzua mbi një pallat banimi në qytetin Galați të Rumanisë gjatë orëve të para të së premtes, duke shkaktuar zjarr dhe duke lënë të plagosur dy persona, njoftuan autoritetet rumune.
Rumania e quajti ndërhyrjen, së bashku me shkeljen e hapësirës së saj ajrore, “një përshkallëzim serioz dhe të papërgjegjshëm
Sipas Ministrisë së Mbrojtjes së Rumanisë, droni hyri në hapësirën ajrore rumune gjatë një vale sulmesh që Rusia po kryente ndaj objektivave në Ukrainë, pranë kufirit me Rumaninë. Pas identifikimit të tij, forcat ajrore rumune ngritën në fluturim dy avionë luftarakë F-16 për monitorimin e situatës.
Autoritetet thanë se droni u gjurmua nga radarët deri në pjesën jugore të qytetit Galați, ku më pas u përplas në çatinë e një pallati banimi. Shpërthimi i ngarkesës së tij shkaktoi zjarr në katin e dhjetë të ndërtesës.
Shërbimet e emergjencës evakuuan rreth 70 banorë nga pallati, ndërsa flakët u vunë nën kontroll. Dy persona morën ndihmë mjekësore për dëmtime të lehta.
Ministria e Jashtme e Rumanisë e cilësoi ngjarjen si një “përshkallëzim serioz dhe të papërgjegjshëm” nga ana e Federatës Ruse. Bukureshti njoftoi se ka informuar Sekretarin e Përgjithshëm të NATO-s dhe ka kërkuar përshpejtimin e furnizimit me sisteme mbrojtëse kundër dronëve.
Edhe NATO reagoi ndaj incidentit. Një zëdhënës i aleancës dënoi atë që e quajti “papërgjegjshmëri të Rusisë” dhe theksoi se NATO do të vazhdojë të forcojë mbrojtjen kundër të gjitha kërcënimeve, përfshirë dronët.
Ky është rasti i parë që nga fillimi i luftës në Ukrainë kur qytetarë rumunë lëndohen si pasojë e drejtpërdrejtë e një droni rus. Megjithatë, incidente të ngjashme kanë ndodhur edhe më parë. Në prill, një tjetër dron rus shkaktoi dëme materiale në Galați, por pa të lënduar.
Sipas Ministrisë së Mbrojtjes së Rumanisë, që nga fillimi i pushtimit rus të Ukrainës në vitin 2022, mbetje ose fragmente dronësh janë gjetur 47 herë në territorin rumun, 12 prej tyre vetëm gjatë këtij viti.
Ndërkohë, gjatë natës u aktivizuan alarmet ajrore në mbarë Ukrainën. Autoritetet ukrainase raportuan se porti i Izmailit, në rajonin e Odesës, u sulmua nga dronë rusë.
Nga ana tjetër, në pjesën e rajonit Donetsk të kontrolluar nga Rusia, autoritetet lokale njoftuan se tre punonjës të shërbimeve publike humbën jetën pas një sulmi me dron që i atribuohet Ukrainës. Një person i katërt mbeti i plagosur rëndë.
