Një aksident i rëndë rrugor ka ndodhur mëngjesin e sotëm në aksin nacional Elbasan–Peqin, në afërsi të fshatit Pajovë, ku një automjet tip veturë është përplasur me një kamion. Si pasojë e goditjes së fortë, kanë mbetur të plagosur rëndë drejtuesja e veturës dhe një fëmijë që udhëtonte me të në mjet.
Të lënduarit janë transportuar me urgjencë nga vendngjarja drejt Spitalit Regional të Elbasanit, ku aktualisht po marrin ndihmën e nevojshme mjekësore nën kujdesin e mjekëve.
Në vendin e ngjarjes kanë mbërritur menjëherë forcat e policisë rrugore dhe grupi hetimor, të cilët kanë nisur punën për menaxhimin e trafikut të krijuar dhe kryerjen e ekspertizës ligjore. Po punohet për zbardhjen e plotë të shkaqeve dhe rrethanave të këtij aksidenti, ndërsa pritet edhe njoftimi zyrtar nga Drejtoria Vendore e Policisë Elbasan.
