Kryeministri Edi Rama e konsideroi sot një lajm të rremë pretendimin që shteti po fal Zvërnecin. Kreu i qeverisë theksoi se kemi të bëjmë me një pronë private dhe investitorë tejet serioz që e kanë marrë pronën nga privati.
“Është ngritur një lajm i rremë sikur shteti po fal Zvërnecin. Shteti nuk po fal asgjë sepse shteti aty s’ka asgjë. Ajo është një pronë private denbabaden. Investitorët e përfshirë në atë proces janë tejet serioz, që atë pronë e kanë marrë nga privati. Shteti është pjesë e projektit dhe do të jetë aty, dhe toka e ishullit do të jetë aty, e shtetit shqiptar”, tha Rama.
Deklarata e kreut të qeverisë u bë teksa ai prezantoi sot kompaninë Albanian Digital Solution Sh.A., një iniciativë që sipas tij synon modernizimin e shërbimeve dhe forcimin e inovacionit teknologjik në vend.
