Fundjava pritet të jetë ideale për plazh dhe aktivitete në natyrë, pasi moti në Shqipëri do të dominohet nga dielli dhe temperaturat e larta, edhe pse pak më të ulëta krahasuar me kulmin e valës së të nxehtit të ditëve të fundit.
Meteorologia Lajda Porja bëri të ditur se temperaturat më të larta të këtij episodi u regjistruan gjatë së mërkurës dhe të enjtes, ku termometri arriti deri në 36°C. Ndërsa sot, temperatura më e lartë është shënuar në Berat me 34.6°C.
Sipas saj, qarqet më të nxehta kanë qenë Berati, Elbasani, Shkodra dhe Gjirokastra, ndërsa në Tiranë temperaturat kanë arritur deri në 34 gradë.
Për fundjavën parashikohet mot i qëndrueshëm, me diell dhe vetëm vranësira të lehta kalimtare. Reshje të pakta mund të ketë vetëm në zonat malore gjatë së dielës, ndërsa temperaturat do të luhaten nga 32 deri në 33°C.
Meteorologia theksoi se kjo valë e hershme e të nxehtit lidhet me depërtimin e masave ajrore afrikane, një fenomen që zakonisht shfaqet në korrik ose gusht. Në këtë periudhë të vitit, temperatura të tilla konsiderohen jo normale, pasi muaji maj zakonisht nuk regjistron më shumë se 25°C.
Sipas Porjas, ndryshimet klimatike kanë bërë që valët e të nxehtit të bëhen më të shpeshta, më intensive dhe më afatgjata. Ajo paralajmëroi se vera 2026 pritet të jetë shumë e nxehtë, edhe për shkak të fenomenit El Niño, i cili ka nisur të ndikojë që nga fillimi i majit.
Meteorologia kujtoi gjithashtu se vera më ekstreme deri tani mbetet ajo e vitit 2023, kur në Elbasan u regjistrua temperatura rekord prej 43.6°C, ndërsa në Sirakuzë të Italisë u shënua rekordi historik europian prej 48.8°C.
Sipas saj, ngrohja globale po ndikon gjithnjë e më shumë edhe në zonat tradicionale të ftohta si Korça, ku dëbora është bërë shumë më e rrallë krahasuar me dekadat e kaluara.
Megjithatë, fundjava që vjen mbetet shumë e favorshme për pushuesit, me temperatura të larta, diell dhe kushte ideale për të nisur sezonin e plazhit.
