Policia e Shtetit ka arrestuar një punonjës të një shoqërie private të sigurisë, i cili dyshohet se ka goditur me grusht një qytetar gjatë protestës së zhvilluar në zonën e Zvërnecit në Vlorë.
Sipas njoftimit zyrtar, ngjarja u bë publike pas publikimit të pamjeve filmike ku shihet momenti i përplasjes mes punonjësit të sigurisë dhe qytetarit E. S.
I arrestuari është shtetasi Geraldo Biba 32 vjeç, banues në Durrës. Ai akuzohet për “heqje të paligjshme të lirisë” dhe “plagosje të lehtë me dashje”.
Sipas hetimeve, ai fillimisht e ka goditur qytetarin dhe më pas, së bashku me dy persona të tjerë të proceduar penalisht, e ka tërhequr me forcë drejt një zone të rezervuar për rojet, duke i shkaktuar dëmtime të lehta.
Menjëherë pas publikimit të pamjeve, është ngritur një grup i posaçëm hetimor për të verifikuar të gjitha veprimet e ndodhura gjatë tubimit të datës 30 maj 2026 në vendin e quajtur “Portonovë”.
Në të njëjtën kohë, është urdhëruar edhe nisja e një hetimi disiplinor për të gjithë zinxhirin komandues të Drejtorisë Vendore të Policisë në Vlorë, lidhur me menaxhimin e situatës gjatë protestës.
Policia e Shtetit bën me dije se po vijon hetimet dhe se çdo shkelje e ligjit apo abuzim me detyrën do të trajtohet sipas procedurave ligjore në fuqi.
