Personi që shihni në foto është Violand Braçellari, një person i shpallur në kërkim për vepra penale të lidhura me lëndët narkotike dhe me precedentë të mëparshëm penalë. Ai dyshohet se është autori i ngjarjes së rëndë të ndodhur në zonën e Podenës, në Bashkinë Maliq, ku gjatë një operacioni policor për kapjen e tij u përfshinë në një përplasje me armë zjarri forcat e rendit.
Sipas informacioneve paraprake, gjatë operacionit Braçellari ka hapur zjarr ndaj efektivëve të Policisë së Shtetit, duke lënë të vrarë një punonjës policie dhe duke plagosur kolegun e tij, Edison Adri. Ngjarja ndodhi në orët e para të mëngjesit, në një zonë të thellë malore, ku i dyshuari raportohet se fshihej prej kohësh dhe njihej si person me rrezikshmëri të lartë dhe njohës i armëve të zjarrit.
Efektivi i plagosur, Edison Adri, ndodhet në gjendje të rëndë shëndetësore. Fillimisht ai është transportuar në Spitalin Rajonal të Korçës, ku ka marrë ndihmën e parë mjekësore, ndërsa mjekët po përgatitin transferimin e tij me helikopter drejt Tiranës për trajtim më të specializuar. Ndërkohë, në vendngjarje vijojnë hetimet për të zbardhur plotësisht dinamikën e incidentit që tronditi opinionin publik dhe strukturat e policisë.
