Vala afrikane përfshin Shqipërinë, fundjava me temperatura deri në 41°C
Shqipëria hyn këtë fundjavë në kulmin e valës së të nxehtit afrikan, me temperatura që pritet të arrijnë deri në 41°C në disa zona të vendit. Sipas meteorologes Lajda Porja, pas disa ditësh kur vendi ishte në periferi të kësaj vale, masat e nxehta tashmë kanë depërtuar plotësisht në territorin shqiptar.
Për ditën e sotme parashikohen temperatura deri në 40°C në zonat mbi Shkodër, ndërsa pjesa më e madhe e ultësirës perëndimore do të regjistrojë vlera nga 38 deri në 39°C. Temperaturat më të larta do të shënohen në Shkodër, Tiranë, Elbasan, Berat dhe Gjirokastër.
Sipas parashikimit, dita më e nxehtë do të jetë e diela, kur termometri pritet të arrijë deri në 41°C në qarqet e Shkodrës dhe Elbasanit, ndërsa në zona si Ura Vajgurore, Cërriku, Belshi dhe Lazarati temperaturat mund të kalojnë lehtësisht 40°C.
Moti do të jetë kryesisht i kthjellët dhe pa reshje gjatë së shtunës, të dielës dhe të hënës. Vetëm pasditen e së premtes priten rrebeshe të izoluara në zonat lindore, ndërsa lagështira e lartë do ta bëjë temperaturën e perceptuar edhe më të lartë.
Një ndryshim i lehtë pritet të martën, kur vala e të nxehtit do të tërhiqet gradualisht, duke sjellë një ulje të temperaturave me 3-4 gradë dhe rikthimin e rrebesheve në pjesën më të madhe të vendit. Bregdeti pritet të mbetet sërish zona me mundësinë më të ulët për reshje.
Meteorologia këshillon qytetarët të shmangin ekspozimin në diell gjatë orëve të pikut, veçanërisht nga ora 11:00 deri në 17:30, pasi temperaturat e matura në hije mund të perceptohen deri në 46°C në zonat urbane. Vëmendje e veçantë u rekomandohet fëmijëve, të moshuarve dhe personave me probleme kardiovaskulare, ndërsa për fundjavën sugjerohen zonat malore, ku temperaturat do të jenë më të ulëta, rreth 34°C në Kukës dhe Has.
Sipas parashikimit, kjo valë e të nxehtit pritet të zgjasë rreth pesë ditë, shumë më pak se episodi ekstrem i verës 2023, i cili zgjati afro tre javë.
