Pas ditëve me temperatura shumë të larta, Shqipëria pritet të përjetojë një freskim gradual gjatë pjesës së dytë të javës. Sipas meteorologut Akil Osmani, temperaturat maksimale do të zbresin në rreth 34-35°C, ndërsa edhe orët e para të mëngjesit do të jenë më të freskëta.
Në zonat malore temperaturat minimale do të luhaten nga 13 deri në 14°C, ndërsa në ultësirën perëndimore do të variojnë nga 17 deri në 22-23°C përgjatë vijës bregdetare.
Edhe pse moti do të mbetet kryesisht i qëndrueshëm, duke nisur nga e marta e deri në fundjavë mëngjeset do të karakterizohen nga intervale të gjata me diell. Gjatë orëve të pasdites pritet zhvillim i vranësirave, të cilat do të sjellin rrebeshe afatshkurtra shiu, kryesisht në zonat lindore dhe pjesërisht në ato qendrore të vendit. Reshje lokale mund të ketë edhe në disa zona të Tiranës dhe Elbasanit.
Meteorologët paralajmërojnë se lagështira e lartë në ajër do të bëjë që temperaturat të ndihen një deri në dy gradë më të larta se vlerat e regjistruara, pavarësisht uljes së lehtë të tyre.
Sa i përket rrebesheve, në disa zona të izoluara të verilindjes dhe juglindjes mund të shfaqet edhe breshër. Megjithatë, sipas parashikimit, fenomeni nuk pritet të jetë me intensitet të lartë apo të ngjashëm me episodet ekstreme të regjistruara së fundmi në disa vende të Europës. Breshëri mund të shkaktojë dëme të kufizuara në bujqësi dhe frutikulturë në zonat ku do të shfaqet.
Edhe vendet e rajonit do të vijojnë të përballen me temperatura të larta. Në Kosovë parashikohen maksimume deri në 36-37°C, ndërsa në zona të izoluara të jugperëndimit të Maqedonisë së Veriut temperaturat mund të arrijnë deri në 38°C.
