Dy burra zbuluan se materniteti i kishte ngatërruar kur ishin foshnje, pak pas lindjes dhe ua kishin dhënë familjeve të gabuara. Atë ditë pati vetëm dy lindje
Kyle Bealin dhe Jeremy Morrison dolën nga një spital në Dakotën e Veriut në SHBA me prindërit e gabuar në vitin 1988. U deshën më shumë se 35 vite që e vërteta të zbulohej.
Familjet e dy burrave, të cilët si foshnja iu dhanë familjeve të gabuara 38 vite më parë, kanë akuzuar spitalin në SHBA se u ka marrë jetën që duhet të kishin jetuar.
Kyle Bylin në vitet 1990. Foto nga familja, nëpërmjet AP
Kyle Bealin zbuloi familjen e tij biologjike pasi bëri një test ADN-je, të cilin e zgjodhi rastësisht gjatë një shkëmbimi dhuratash për Krishtlindje. Rezultatet e çuan te tezja e tij biologjike përmes një platforme gjenealogjie.
Më pas, nipi i saj, Jeremy Morrison, bëri gjithashtu test ADN-je dhe kështu u zbulua se dy burrat ishin ndërruar në lindje, gati katër dekada më vonë.
“Aty mbeta plotësisht i shtangur”, tha Bealin. “Nuk do ta kishim imagjinuar kurrë se kishte ndodhur vërtet një ndërrim në lindje.”
Sipas padisë së depozituar javën e kaluar në një gjykatë shtetërore, Bealin dhe Morrison ishin dy foshnjat e vetme të lindura më 26 janar 1988 në Unity Medical Center në Grafton të Dakotës së Veriut.
Megjithatë, ata dolën nga spitali me prindërit e gabuar.
Spitali nuk e kundërshton faktin se foshnjat janë ndërruar, por deklaron se nuk ka gjetur asnjë provë që të tregojë se stafi i tij ka qenë përgjegjës për këtë gabim që u ndryshoi jetën, siç raportoi Sky News.
“Më morën jetën që duhet të kisha jetuar me djalin tim biologjik”
“Kyle mbetet djali im dhe kjo nuk do të ndryshojë kurrë”, deklaroi Evelyn Newton.
“Por ndiej se më është marrë jeta që duhet të kisha jetuar me djalin tim biologjik. Nuk mund të kthehesh pas dhe të rikuperosh 35 vite. Hapat e parë, drejtimi i makinës, martesa, si mund t’i rikuperosh këto?”
Zbulimi i fundit për lindjen e tij nuk i ka ndryshuar ndjenjat e Morrison për familjen që e rriti.
“Ata më donin”, tha ai. “Luaja sporte, isha mirë në shkollë. Një test ADN-je nuk do të më marrë 38 vite kujtimesh.”
Megjithatë, Morrison, i cili jeton në Kolorado dhe punon si inspektor saldimi në një kompani të energjisë së erës, beson se nëse ndërrimi nuk do të kishte ndodhur, ai do të punonte bashkë me babanë e tij biologjik dhe vëllain në fermën e tyre të drithërave.
Bud Bylin (LR), Darren Bylin, Kyle Bylin dhe Keith Bylin
Zonja Newton nuk kishte pasur kurrë arsye të mendonte se Bealin nuk ishte djali i saj biologjik. Bealin, nga ana tjetër, ndoqi një karrierë akademike larg Dakotës së Veriut dhe gjithmonë ishte ndier “ndryshe” nga familja që e kishte rritur.
Ai tha se “patjetër ka pasur momente të ndryshme në jetën time kur jam ndier si delja e zezë e familjes, ose sikur po kërkoja një vend ku të përkisja”.
Vetëm vite më vonë ai zbuloi se kishte vërtet një ndryshim dhe se ekzistonte një arsye pse nuk ndihej 100 për qind pjesë e asaj familjeje.
Kyle Bylin me nënën e tij biologjike, Liz O’Toole, në Minneapolis. Foto familjare nëpërmjet AP
Dy burrat tashmë i kanë njohur prindërit e tyre biologjikë, por ende nuk janë takuar me njëri-tjetrin. Megjithatë, sipas raportimit, ata kanë folur në telefon./noa/
