Detaje të reja janë zbardhur nga ngjarja e rëndë e regjistruar mëngjesin e së hënës në Korçë, ku 66-vjeçari Irakli Çinoku u gjet i pajetë brenda një automjeti të përfshirë nga flakët.
Sipas të dhënave paraprake, mësohet se 66-vjeçari jetonte i vetëm në periudhën e fundit, pasi kishte pasur probleme në marrëdhënien familjare me bashkëshorten e tij. Kjo e fundit, së bashku me dy fëmijët e çiftit, ishte larguar për të jetuar në Greqi.
Burime pranë hetimit bëjnë me dije se viktima kishte lënë një shënim para ngjarjes së rëndë, ku dyshohet se kishte shkruar: “Po iki se nuk jam sjellë mirë me familjen”.
Dyshimet paraprake të grupit hetimor janë se 66-vjeçari mund t’i ketë dhënë fund jetës për shkak të gjendjes së rënduar emocionale dhe ndjenjës së fajit për marrëdhënien e tij me familjen. Megjithatë, rrethanat e plota të ngjarjes mbeten ende objekt hetimi.
Sipas njoftimit zyrtar të Policisë, rreth orës 08:40, në lagjen nr. 10 të Korçës, një automjet tip “Benz” është përfshirë nga flakët.
Shërbimet e Policisë dhe ato të zjarrfikëses kanë mbërritur menjëherë në vendngjarje, ku kanë konstatuar se në sediljen e parë të pasagjerit ndodhej pa shenja jete shtetasi I. Ç., rreth 66 vjeç.
Nga veprimet e para hetimore dhe informacionet paraprake dyshohet se 66-vjeçari mund të jetë vetëdjegur brenda automjetit.
Grupi hetimor, nën drejtimin e Prokurorisë, vijon punën për zbardhjen e plotë të shkaqeve dhe rrethanave të kësaj ngjarjeje të rëndë.
