Një burrë u ndalua fillimisht me sprej piperi dhe më pas u neutralizua duke u shtrirë me fytyrë përtokë, ndërsa iu lidhën duart dhe këmbët.
Kështu humbi jetën Abderrahim Fakir, 42 vjeç, me origjinë marokene dhe me qëndrim të rregullt në Itali. Ai u ndalua mëngjesin e së dielës nga policia pasi kishte shfaqur sjellje të pakontrolluara në rrugën Svevo, në zemër të lagjes Pilastro, një zonë popullore dhe multietnike e Bolonjës.
Një video tronditëse tregon momentet e fundit të jetës së tij, ndërsa ai dëgjohet duke bërtitur vazhdimisht: “Mjaft, ndihmë!”, derisa humbet ndjenjat para syve të policëve dhe disa punonjësve të urgjencës që kishin mbërritur në vendngjarje. Policia e Bolonjës bëri të ditur se pamjet e regjistruara nga kamerat trupore të efektivëve do t’i dorëzohen menjëherë prokurorit Domenico Ambrosino.
Ngjarja ndodhi në të njëjtën lagje që u bë e njohur gjatë fushatës zgjedhore të vitit 2020, kur Matteo Salvini vizitoi një pallat në kërkim të personave që dyshoheshin për trafik droge. Pas vdekjes së 42-vjeçarit, banorët dhe familjarët e tij dolën në rrugë duke kërkuar me zë të lartë “drejtësi” dhe duke protestuar kundër policisë.
Gjithçka ndodhi në fund të paradites së një të diele të nxehtë vere, kur banorët e Pilastros njoftuan policinë për praninë e një burri që po sillej në mënyrë agresive në një garazh në rrugën Svevo. Bëhej fjalë për Abderrahim Fakir, pronar i një kompanie transporti mallrash, i cili kishte ardhur në lagje për të vizituar disa të afërm.
Në vendngjarje mbërritën një patrullë policie dhe një ambulancë. Sipas autoriteteve, policët u përpoqën ta qetësonin, por ai reagoi ndaj tyre dhe goditi me shkelma edhe makinën e policisë.
Më pas, sipas rindërtimit të ngjarjes, efektivët përdorën sprej piperi dhe e rrëzuan përtokë, duke i mbajtur duart pas shpine me gjunjë mbi trup, në përpjekje për t’i vendosur prangat. Këto momente u filmuan nga një banor që po ndiqte ngjarjen nga dritarja e banesës së tij.
Në video dëgjohet burri duke bërtitur: “Mjaft, ndihmë!”. Ndërsa policët përpiqeshin ta immobilizonin, ai vazhdonte të përpëlitej. Një person i tretë, që mendohet të ketë qenë banor i zonës, ndihmoi duke i mbajtur këmbët. Pak çaste më vonë, 42-vjeçari duket se humbet ndjenjat.
Njëri prej policëve kontrolloi gjendjen e tij, por nuk mori përgjigje. Në vendngjarje ndodheshin edhe dy punonjës të urgjencës, të cilët në pamjet filmike nuk shihen të ndërhyjnë derisa burri, tashmë pa ndjenja, ishte lidhur në duar dhe këmbë.
Autoriteti Shëndetësor Lokal i Bolonjës (Ausl) ka nisur një hetim të brendshëm për të sqaruar rrethanat e ngjarjes.
“Nuk do të gjej qetësi derisa vëllai im të marrë drejtësi,” tha mes lotësh motra e viktimës. “Nuk e dimë çfarë ndodhi. Atë e di policia. Ne vetëm morëm telefonatën se kishte vdekur. E prangosën dhe ai vdiq. Ata e sulmuan. E rrahën dhe e vranë. Ka dëshmitarë.”
Dhjetëra banorë dolën në rrugë dhe protestuan kundër policisë. Situata u qetësua vetëm pas ndërhyrjes së vëllait të viktimës, i cili jetonte me të.
“Ai kërkonte vetëm ndihmë. Nuk bëri asgjë. Ishte i shqetësuar dhe vazhdonte të thërriste: ‘Ndihmë, ndihmë, ndihmë’,” tha një prej banorëve të pallatit.
Nga ana e saj, policia deklaroi se efektivët kishin ndërhyrë pas telefonatave të qytetarëve që sinjalizonin një person në gjendje të rënduar psikologjike. Sipas policisë, për ta neutralizuar burrin u kërkua edhe ndihma e disa qytetarëve, pasi ai kishte dëmtuar edhe një automjet. Gjithashtu u thirr menjëherë ambulanca dhe, pas përfundimit të ndërhyrjes, edhe në praninë e personelit shëndetësor, burri ndërroi jetë.
Kryetari i Bashkisë së Bolonjës, Matteo Lepore, dhe presidenti i Rajonit Emilia-Romagna, Michele de Pascale, kanë kërkuar që të zbardhet plotësisht e vërteta mbi ngjarjen.
Në mbrëmje, banorët e lagjes Pilastro organizuan një protestë, ndërsa familjarët e Abderrahim Fakir e kanë cilësuar vdekjen e tij si “një vrasje shtetërore”.
Edhe senatorja italiane Ilaria Cucchi reagoi pas publikimit të videos, duke e cilësuar ngjarjen “jashtëzakonisht të rëndë”. Ajo tha se shpreson që kjo të mos jetë një tjetër rast si ato të Riccardo Magherini dhe Federico Aldrovandi, ku persona në gjendje të rënduar humbën jetën gjatë ndërhyrjeve të forcave të rendit. Sipas saj, një person që kërkonte ndihmë u përball me përdorimin e forcës. Cucchi njoftoi se do të paraqesë një interpelancë parlamentare për këtë çështje.
