Gjendet i pajetë polici nga Prizreni në varrezat e Morinës, nisin hetimet
Një 35-vjeçar nga Prizreni, punonjës policie në Njësinë e Reagimit të Shpejtë, është gjetur pa shenja jete mëngjesin e kësaj të mërkure në varrezat e fshatit Morinë, në Kukës.
Sipas informacionit paraprak të Policisë, ngjarja është konstatuar rreth orës 08:25. Pranë viktimës është gjetur dhe sekuestruar një armë zjarri, e cila do t’i nënshtrohet ekspertizës.
Një grup i posaçëm hetimor, nën drejtimin e Prokurorisë, po vijon veprimet për zbardhjen e plotë të rrethanave të ngjarjes.
Policia e Shtetit po bashkëpunon gjithashtu me Policinë e Kosovës për të verifikuar nëse arma e sekuestruar ishte arma e shërbimit të 35-vjeçarit dhe për të siguruar të gjitha informacionet e nevojshme për dokumentimin ligjor të rastit.
Kukës / Informacion paraprak
Më datë 22.07.2026, rreth orës 08:25, në varrezat e fshatit Morinë është gjetur pa shenja jete shtetasi Sh. H., 35 vjeç, banues në Prizren, punonjës policie në Njësinë e Reagimit të Shpejtë në Prizren.
Nga veprimet paraprake hetimore dyshohet se 35-vjeçari ka vrarë veten me armë zjarri pistoletë, e cila u sekuestrua në cilësinë e provës materiale.
Një grup i posaçëm hetimor, nën drejtimin e Prokurorisë, po vijon veprimet për sqarimin e plotë të rrethanave të ngjarjes.
Ndërkohë, Policia e Shtetit po bashkëpunon me Policinë e Kosovës për të verifikuar nëse arma e zjarrit e sekuestruar është arma e shërbimit të 35-vjeçarit, si dhe për sigurimin e çdo informacioni që do t’i shërbejë dokumentimit të plotë ligjor të rastit.