Meteorologia Lajda Porja ka paralajmëruar se Shqipëria do të përballet me një tjetër episod moti të paqëndrueshëm, ku rreziku më i madh nuk do të jenë reshjet, por era shumë e fortë, e cila në disa zona bregdetare mund të arrijë deri në 100 km/h.
Sipas saj, pas stuhive të ditëve të fundit që shkaktuan edhe humbje jete, situata mbetet shqetësuese, pasi temperaturat e larta të kombinuara me depërtimin e masave të ftohta ajrore favorizojnë krijimin e fenomeneve të forta atmosferike.
Porja shpjegoi se dita e enjte sjell një qetësim të përkohshëm, ndërsa të premten pritet një tjetër forcim i erës, kryesisht përgjatë vijës bregdetare.
“Parametri më problematik do të jetë era. Në disa zona të bregdetit, sidomos në jug, priten shpejtësi shumë të larta, ndërsa reshjet do të jenë më të pakta”, tha ajo.
Sipas parashikimit, qarku i Vlorës do të jetë zona më e ekspozuar, ndërsa erë e fortë pritet edhe në Durrës, Lezhë dhe Shëngjin. Në veri priten reshje më intensive dhe shtrëngata, ndërsa në jug do të dominojë era.
Meteorologia paralajmëroi se në det dallgëzimi mund të arrijë deri në 6-7 ballë, çka mund të sjellë pezullim të mjeteve të vogla lundruese dhe rrezik të shtuar për pushuesit.
Ajo bëri të ditur se fundjava do të jetë më e qetë, me dobësim të erës, por një tjetër stuhi pritet të rikthehet të hënën, e shoqëruar me reshje, shkarkesa elektrike dhe erë të fortë.
Sipas Porjes, fenomenet e tilla janë pasojë e përplasjes së masave shumë të nxehta ajrore me ato të ftohta që zbresin nga Europa Veriore, ndërsa ndryshimet klimatike po i bëjnë këto stuhi gjithnjë e më agresive.
Meteorologia u bëri thirrje qytetarëve të shmangin lundrimin me mjete të vogla gjatë ditës së premte, të tregojnë kujdes me objektet në ballkone dhe tarraca, si edhe të mos ekspozojnë fëmijët në det gjatë orëve kur era dhe dallgët janë më intensive.
Për pushuesit, rekomandimi është që e premtja të konsiderohet një ditë me rrezik të lartë për aktivitetet në bregdet, ndërsa kushtet pritet të përmirësohen gjatë së shtunës dhe të dielës, përpara se moti të përkeqësohet sërish në fillim të javës së ardhshme.
