Refit (Nertil) Buzi, 35-vjeçari i dyshuar për vrasjen e ish-vjehrrit të tij, plagosjen e ish-vjehrrës dhe rrëmbimin e ish-të fejuarës në fshatin Vidhishtë të Roskovecit, ka bërë pretendime lidhur me motivet e ngjarjes, ndërsa vijon të jetë në arrati.
Sipas informacioneve të publikuara, Buzi është shfaqur duke qarë dhe ka deklaruar se ka humbur një shumë prej 730 mijë paundësh, për të cilën fajëson familjarët e ish-partneres së tij.
“Ata ma kanë bërë, më kanë marrë 730 mijë paund”, raportohet të jetë shprehur 35-vjeçari.
Ngjarja e rëndë ndodhi paraditen e së premtes, kur Buzi dyshohet se qëlloi për vdekje me armë zjarri ish-vjehrrin e tij, Kosta (Arben) Plaka, si dhe plagosi ish-vjehrrën, Belere Plaka. Më pas, ai u largua nga vendi i ngjarjes duke marrë me vete ish-partneren, të cilën e liroi disa orë më vonë pas ndërhyrjes dhe rrethimit të zonës nga forcat speciale.
Ndërkohë, operacioni për kapjen e autorit të dyshuar vijon me intensitet. Në kërkim janë angazhuar efektivë të Policisë së Shtetit, Forcës së Posaçme Operacionale, RENEA-s, FNSH-së dhe Drejtorisë Vendore të Policisë Fier.
Kontrollet janë përqendruar në zonën e fshatit Çerven, në kufi me Mallakastrën, pranë fshatit Drenie, ku dyshohet se 35-vjeçari mund të jetë fshehur. Operacioni po zhvillohet nga toka dhe me mbështetjen e dronëve.
Policia vijon kërkimet për lokalizimin dhe arrestimin e Nertil Buzit, ndërsa u ka bërë thirrje qytetarëve që çdo informacion të vlefshëm ta përcjellin pranë strukturave të rendit.
