Një aksident i rëndë rrugor është regjistruar mëngjesin e sotëm në aksin Dukat–Orikum, në zonën e Fushë-Dukat, ku një person ka humbur jetën dhe pesë të tjerë kanë mbetur të plagosur.
Ngjarja ka ndodhur rreth orës 06:10, kur një furgon që transportonte punëtorë, të cilët dyshohet se ishin nisur nga Tirana drejt bregdetit, ka dalë nga rruga dhe ka përfunduar në një kanal anësor.
Sipas dyshimeve paraprake, humbja e kontrollit mbi mjetin mund të ketë ardhur si pasojë e përgjumjes së drejtuesit ose një problemi të mundshëm shëndetësor, ndërsa shkaqet e sakta do të përcaktohen nga hetimet.
Përplasja ka qenë e fortë, duke shkaktuar dëmtime të konsiderueshme në furgon, i cili ka përfunduar pjesërisht i përmbysur. Për nxjerrjen e të plagosurve, të cilët kishin mbetur të bllokuar mes llamarinave dhe pjesëve të deformuara të mjetit, është dashur ndërhyrja e forcave zjarrfikëse, të cilat kanë prerë pjesë të sediljeve dhe të strukturës së furgonit.
Si pasojë e aksidentit ka humbur jetën Ilir Haka, 52 vjeç, ndërsa të plagosur kanë mbetur Saimir Haka, 22 vjeç, Qazim Haka, 44 vjeç, Sako Rexha, rreth 22 vjeç, si dhe dy persona të tjerë.
Të lënduarit janë transportuar me ambulanca drejt Spitalit Rajonal të Vlorës, ku po marrin ndihmën mjekësore. Ndërkohë, trupi i viktimës është dërguar në morgun e spitalit.
Në vendngjarje ndodhen shërbimet e Policisë Rrugore dhe grupi hetimor, të cilët po kryejnë matjet dhe veprimet procedurale për të zbardhur shkaqet dhe rrethanat e plota të aksidentit.
Vlorë/Informacion paraprak
Rreth orës 06:10, në aksin rrugor Vlorë–Llogora, në vendin e quajtur “Fushë Dukat”, një automjet tip furgon, me drejtues shtetasin S. R., 22 vjeç, dyshohet se ka humbur kontrollin mbi drejtimin e mjetit dhe ka dalë nga rruga.
Si pasojë e aksidentit, ka humbur jetën në vendngjarje njëri prej pasagjerëve, shtetasi I. H., 52 vjeç.
Drejtuesi i mjetit dhe 3 pasagjerët e tjerë janë transportuar në spital, ku ndodhen nën kujdesin e mjekëve.
Grupi hetimor ndodhet në vendngjarje dhe, nën drejtimin e Prokurorisë, po kryen veprimet procedurale për zbardhjen e plotë të shkaqeve dhe rrethanave të aksidentit.
