Kryetari i Partisë Mundësia, Agron Shehaj, ka reaguar pas incidentit të regjistruar në Kuvend, ku u pa duke marrë kopjen e marrëveshjes së huas prej 302 milionë dollarësh me Shtetet e Bashkuara të Amerikës dhe duke u larguar nga salla.
Në një deklaratë për mediat, Shehaj sqaroi se dokumentin e mori për ta shqyrtuar, pasi, sipas tij, kryetari i Kuvendit, Niko Peleshi, kishte njoftuar deputetët se marrëveshja mund të tërhiqej në zyrën përkatëse pas nënshkrimit të deklaratës së konfidencialitetit.
“Shkova, firmosa dokumentin për mospërndarjen e marrëveshjes dhe u largova. Kryeparlamentari u tha deputetëve se mund ta merrnin në zyrën përkatëse. Nuk tha që nuk mund ta merrje”, u shpreh Shehaj.
Ai theksoi se, pasi e lexoi dokumentin, e dorëzoi sërish në zyrën ku e kishte marrë, duke shtuar se marrëveshja nuk ka dalë jashtë ambienteve të Kuvendit.
“Marrëveshjen e dorëzova sërish aty ku e mora. Marrëveshja nuk ka dalë nga Kuvendi i Shqipërisë. E mora sepse më takonte. Ajo është një marrëveshje konfidenciale dhe nuk jam i autorizuar të jap detaje”, deklaroi kreu i Partisë Mundësia.
Lidhur me votimin, Shehaj tha se subjekti që ai drejton mbështet në parim marrëveshjen e huas me SHBA-në, por kundërshton procedurën e ndjekur për miratimin e saj në Kuvend.
“Ne jemi pro marrëveshjes, por jemi kundër procedurës që po ndiqet nga Kuvendi”, përfundoi ai.
