Shqipëria pritet të përfshihet sërish nga një valë e fortë e të nxehtit afrikan, me temperaturat që do të rriten ndjeshëm gjatë kësaj jave dhe do të kulmojnë në ditët e para të muajit gusht.
Meteorologia e MeteoAlb, Lajda Porja, bëri të ditur se temperaturat kanë nisur të rriten që nga dita e hënë, ndërsa kulmi i vapës pritet të regjistrohet të enjten dhe të premten, kur termometri do të shënojë deri në 40 gradë Celsius në shumë zona të vendit.
Sipas saj, nga dita e mërkurë do të ulet edhe intensiteti i erës, duke bërë që temperaturat e larta të ndihen edhe më të forta.
“Që nga e mërkura dhe në vijim do të kemi rënie të intensitetit të erës, duke bërë që i nxehti të ndihet akoma më shumë. Maksimumi i temperaturave pritet të regjistrohet të enjten dhe të premten, kur termometri do të shënojë deri në 40 gradë Celsius”, u shpreh meteorologia.
Porja theksoi se java e parë e gushtit do të dominohet nga temperatura ekstreme, të cilat në disa qytete të vendit mund të arrijnë deri në 42 gradë Celsius.
Sipas parashikimeve, qarqet e Shkodrës, Elbasanit dhe Beratit do të jenë ndër zonat më të prekura nga vapa, ndërsa temperatura shumë të larta pritet të regjistrohen edhe në Tiranë, Fier dhe Lushnjë. Edhe në Kukës dhe Has termometri mund të shkojë deri në 36 gradë Celsius, ndërsa zonat juglindore do të kenë kushte disi më të freskëta.
Sa i përket reshjeve, meteorologia bëri të ditur se ato do të jenë pothuajse të papërfillshme. Nga e marta e në vijim moti do të jetë i thatë dhe kryesisht i kthjellët.
Sipas MeteoAlb, kjo është vala e tretë e të nxehtit që prek vendin gjatë muajit korrik dhe pritet të zgjasë deri rreth datave 8-9 gusht.
Meteorologia shtoi se rritje të ndjeshme të temperaturave do të përjetojnë edhe vendet e rajonit. Në Kosovë temperaturat pritet të arrijnë deri në 38 gradë Celsius, ndërsa moti i nxehtë do të përfshijë gradualisht edhe Maqedoninë e Veriut, Malin e Zi dhe pjesën tjetër të Ballkanit.
